ಸೂರ್ಯನ ಮೇಲ್ಮೈ ವಾತಾವರಣದ ಸೌರಮಾರುತಗಳನ್ನು ಚಿತ್ರೀಕರಿಸಲು, ಇಲೆಕ್ಟ್ರಿಕ್ ಹಾಗೂ ಮ್ಯಾಗ್ನೆಟಿಕ್, ಪ್ಲಾಸ್ಮಾ, ಇನ್ನಿತರ ವಸ್ತು, ಕಣಗಳನ್ನು ಅಧ್ಯಯನ ನಡೆಸಲು ಹೊರಟಿರುವ ಈ ನೌಕೆಗೆ ವಿಜ್ಞಾನಿ ಯೂಜಿನ್ ಪಾರ್ಕರ್ ಗೌರವಾರ್ಥವಾಗಿ ಅವರ ಹೆಸರನ್ನು ಇಡಲಾಗಿದೆ. ಸೂರ್ಯನ ವಾತಾವರಣದಲ್ಲಿ ಸದಾ ಕಾಲ ಪ್ರಚಂಡ ಬಿರುಗಾಳಿ ಇರುತ್ತದೆ ಎಂದು ಈಜೀನ್ ಪಾರ್ಕರ್ ಎಂಬ ವಿಜ್ಞಾನಿ ಹೇಳಿದ್ದರಿಂದಾಗಿ, ಈ ಗಗನ ನೌಕೆಗೆ ಪಾರ್ಕರ್ ಎಂಬ ಹೆಸರು ಬಂದಿದೆ.

ಈ ಹಿಂದೆ ಹಲವು ಬಾರಿ ಸೂರ್ಯನಲ್ಲಿಗೆ ನಾಸಾ ಶೋಧ ನೌಕೆಗಳನ್ನು ಹಾರಿ ಬಿಟ್ಟಿದೆ. ಆದರೆ, ಇದೇ ಮೊದಲ ಬಾರಿಗೆ ಸೂರ್ಯನಿಗೆ ಅತ್ಯಂತ ಹತ್ತಿರಕ್ಕೆ ಹೋಗುತ್ತಿರುವ ನೌಕೆ ಇದಾಗಿದೆ. ಪಾರ್ಕರ್​ ಉಪಗ್ರಹ ಸೂರ್ಯನಿಂದ ಸುಮಾರು 7 ಲಕ್ಷ ಕಿಲೋಮೀಟರ್​ ಹತ್ತಿರದವರೆಗೆ ಹಾರಲಿದೆ ಎಂದು ನಾಸಾ ತಿಳಿಸಿದೆ. ಈ ನೌಕೆಯು ಸೂರ್ಯನ ಸುತ್ತ ಇರುವ ಕರೋನಾ ವಲಯವನ್ನು ಸುಮಾರು 24 ಬಾರಿ ಹಾದು ಹೋಗುವ ಪಾರ್ಕರ್ ನೌಕೆ

ಸೂರ್ಯನ ಮೇಲ್ಮೈನಲ್ಲಿ ಇದ್ದಕ್ಕಿದ್ದಂತೆ ಉಷ್ಣಾಂಶದಲ್ಲಿ ಏರಿಳಿತ ಆಗುವುದೇಕೆ ಎಂಬುದನ್ನು ತಿಳಿಯುವ ಮುಖ್ಯ ಗುರಿಯನ್ನು ಈ 'ಪಾರ್ಕರ್​ ಸೋಲಾರ್​ ಪ್ರೋಬ್' ನೌಕೆ ಹೊಂದಿದೆ. ಆಗಾಗ ಬೀಸುವ ಸೌರ ಮಾರುತಗಳ ಕುರಿತು ಸಹ ಅಧ್ಯಯನ ನಡೆಸಲಿದೆ. ಜತೆಗೆ ಶಕ್ತಿಯ ಕಣಗಳು ಚಲಿಸೋಕೆ ಕಾರಣವಾಗುವ ಅಂಶಗಳು ಯಾವುವು ಎಂಬ ಮಾಹಿತಿ ಕಲೆ ಹಾಕಲಿದೆ.

ಫ್ಲೋರಿಡಾದ ಕೇಪ್​ ಕಾರ್ನವೆರಲ್​ನಿಂದ ಡೆಲ್ಟಾ 4 ನೌಕೆಯ ಮೂಲಕ ಹಾರುತ್ತಿರುವ 'ಪಾರ್ಕರ್​ ಸೋಲಾರ್​ ಪ್ರೋಬ್' ಒಂದು ಕಾರಿನ ಗಾತ್ರದ ಶೋಧ ನೌಕೆಯಾಗಿದೆ. ಈ ಉಪಗ್ರಹದಲ್ಲಿ ಫೀಲ್ಡ್ಸ್​, ಈಸೋಸ್​, ವಿಸ್ಪರ್​, ಸ್ವೀಪ್​, ಹೀಲಿಯೋಸ್ಪ್​​ ಎಂಬ ನಾನಾ ಉಪಕರಣಗಳನ್ನು ಅಳವಡಿಸಲಾಗಿದ್ದು, ಅವೆಲ್ಲವನ್ನು ತನ್ನ ಜತೆ ಒಯ್ಯಲಿದೆ.

ಸೂರ್ಯನ ಅಪಾರ ಶಾಖ ಹಾಗೂ ರೇಡಿಯೇಷನ್​ನಿಂದ ರಕ್ಷಣೆ ನೀಡುವ ಸಲುವಾಗಿ ನೌಕೆಗೆ ಅಲ್ಟ್ರಾ ಪವರ್ ಹೀಟ್ ಶೀಲ್ಡ್ ಅಳವಡಿಕೆ ಮಾಡಲಾಗಿದೆ. ಇದರಿಂದ . ಶೀಲ್ಡ್ ಕೇವಲ 4.5 ಇಂಚು ದಪ್ಪವಾಗಿದೆ. ಎಷ್ಟೇ ಶಾಖ ಇದ್ದರೂ ನೌಕೆಯ ಒಳಭಾಗದಲ್ಲಿ 29 ಡಿಗ್ರಿ ಸೆಲ್ಶಿಯಸ್ ಉಷ್ಣಾಂಶ ಇರಲಿದೆ ಎಂದು ನಾಸಾ ಮಾಹಿತಿ ನೀಡಿದೆ.

ನೌಕೆ ಹೊತ್ತಿರುವ ನಾನಾ ಉಪಕರಣಗಳಲ್ಲಿ ಈಸೋಸ್,​ ಶಕ್ತಿಶಾಲಿ ಎಲೆಕ್ಟ್ರಾನ್​ಗಳು, ಪ್ರೋಟಾನ್​ಗಳು ಮತ್ತು ಇತರ ಭಾರದ ಅಯಾನ್​ಗಳ ಕುರಿತು ಅಧ್ಯಯನ ನಡೆಸಲಿದ್ದರೆ, ಫೀಲ್ಡ್ಸ್​​ ಉಪಕರಣ ಸೂರ್ಯನ ವಿದ್ಯುತ್​ ವಲಯ, ಗುರುತ್ವಾಕರ್ಷಣ ಶಕ್ತಿ, ರೇಡಿಯೋ ತರಂಗಗಳ ಕುರಿತು ಸಂಶೋಧನೆ ನಡೆಸಲಿದೆ.

ಫೀಲ್ಡ್ಸ್ ಮತ್ತು ಈಸೋಸ್​ ಕಾರ್ಯಗಳು ಮೇಲೆ ತಿಳಿಸಿದಂತಿದ್ದರೆ, ಸೂರ್ಯನ ಮೇಲ್ಮೈ ಅಂದರೆ ಕರೋನಾ ಮತ್ತು ಒಳ ವಾತಾವರಣದ ಚಿತ್ರಗಳನ್ನು ಆಪ್ಟಿಕಲ್​ ಇಮೇಜ್​ ಸೆನ್ಸಾರ್​ ಸೆರೆ ಹಿಡಿಯಲಿದೆ.ಸ್ವೀಪ್​ ಎಲೆಕ್ಟ್ರಾನ್​ಗಳು, ಪ್ರೋಟಾನ್​ಗಳು ಮತ್ತು ಹೀಲಿಯಂ ಅಯಾನ್​ಗಳ ಸಂಖ್ಯೆಯನ್ನು ಲೆಕ್ಕ ಹಾಕಿ ಅವುಗಳ ಸಾಂದ್ರತೆ ಮತ್ತು ಶಾಖದ ಕುರಿತು ಮಾಹಿತಿ ನೀಡಲಿದೆ.