Back
Home » ಇತ್ತೀಚಿನ
8 ಗಂಟೆಗಳ ಕಾಲ ಫೇಸ್‌ಬುಕ್, ಇನ್‌ಸ್ಟಾ ಡೌನ್‌ ಆಗಲು ಕಾರಣ ಏನು ಗೊತ್ತಾ?
Gizbot | 14th Mar, 2019 05:36 PM

ಜಗತ್ತಿನಾದ್ಯಂತ ಜನಪ್ರಿಯ ಸಾಮಾಜಿಕ ಜಾಲತಾಣಗಳಾದ ಫೇಸ್​ಬುಕ್ ಮತ್ತು ಇನ್​ಸ್ಟಾಗ್ರಾಂಗಳ ಬಳಕೆದಾರರು ಲಾಗಿನ್ ಮತ್ತು ಇನ್ನಿತರ ಸಮಸ್ಯೆಗಳನ್ನು ಅನುಭವಿಸಿದ್ದಕ್ಕೆ ಫೇಸ್‌ಬುಕ್ ಸಂಸ್ಥೆ ವಿಷಾದ ವ್ಯಕ್ತಪಡಿಸಿದೆ. ಇಡೀ ಜಗತ್ತಿನೆಲ್ಲೆಡೆ ಈ ಎರಡೂ ಜಾಲತಾಣಗಳ ಕಾರ್ಯ ನಿಧಾನಗೊಂಡಿದ್ದು, 'ಫೇಸ್​ಬುಕ್ ವಿಲ್ ಬಿ ಬ್ಯಾಕ್​ ಸೂನ್​' ಎಂಬ ಮೆಸೇಜ್ ಮೊಬೈಲ್ ಅಥವಾ ಕಂಪ್ಯೂಟರ್​ ಪರದೆಯ ಮೇಲೆ ಕಾಣಿಸಿಕೊಳ್ಳುತ್ತಿರುವುದಕ್ಕೆ ಕಾರಣ ಏನು ಎಂಬುದು ಇದೀಗ ತಿಳಿದುಬಂದಿದೆ.

ಫೇಸ್‌ಬುಕ್ ಮತ್ತು ಇನ್​ಸ್ಟಾಗ್ರಾಂ ಖಾತೆಗಳಿಗೆ ಲಾಗಿನ್ ಆಗದಂತಹ ಸಮಸ್ಯೆ ಬಗ್ಗೆ ಮಾತನಾಡಿರುವ ಸಂಸ್ಥೆ, ನಮಗೆ ಸಮಸ್ಯೆ ಬಗ್ಗೆ ಅರಿವಿದ್ದು, ಕೆಲ ನಿರ್ವಹಣಾ ಕಾರ್ಯಗಳಿಗಾಗಿ ಫೇಸ್‌ಬುಕ್ ಸಂಪರ್ಕವನ್ನು ಸ್ಥಗಿತಗೊಳಿಸಿರುವುದಾಗಿ ತಿಳಿಸಿದೆ. ಆದರೆ, ಕೆಲವೇ ಕ್ಷಣಗಳಲ್ಲಿ ಫೇಸ್​ಬುಕ್ ತಾಣದಲ್ಲಿನ ಈ ಸಮಸ್ಯೆಯನ್ನು ಬಗೆಹರಿಸಲಾಗುವುದು. ನಿಮ್ಮ ತಾಳ್ಮೆಗೆ ಧನ್ಯವಾದ ಎಂದು ಕಂಪೆನಿ ತನ್ನ ಅಧಿಕೃತ ವೆಬ್​ಸೈಟ್​ನ ಸಂದೇಶದಲ್ಲಿ ಹೇಳಿಕೊಂಡಿದೆ.

ಇದೇ ಮೊದಲ ಬಾರಿಗೆ ಜನಪ್ರಿಯ ಸಾಮಾಜಿಕ ಮಾಧ್ಯಮ ದೀರ್ಘಕಾಲದ ವರೆಗೂ ಸ್ಥಗಿತಗೊಂಡಿದ್ದು, ಬುಧವಾರ ರಾತ್ರಿಯಿಂದ ಕಾಣಿಸಿಕೊಂಡಿರುವ ಈ ಸಮಸ್ಯೆ ಎಂಟು ಗಂಟಗಳನ್ನು ಮೀರಿರುವುದು ಆಶ್ಚರ್ಯವಾಗಿದೆ. ಹೀಗೆ ಫೇಸ್​ಬುಕ್ ಮತ್ತು ಇನ್​ಸ್ಟಾಗ್ರಾಂಗಳು ಹೆಚ್ಚು ಸಮಯ ಡೌನ್ ಆಗಿರುವ ಬಗ್ಗೆ ಮತ್ತೊಂದು ಸ್ಪಷ್ಟನೆ ನೀಡಿರುವ ಸಂಸ್ಥೆ, 'ಇದು ಸಂಪರ್ಕ ಸೇವೆಯನ್ನು ಸ್ಥಗಿತಗೊಳಿಸಲು ನಡೆದಿರುವ ದಾಳಿಗೆ ಸಂಬಂಧಿಸಿಲ್ಲ' ಎಂಬುದನ್ನು ಸಹ ಸ್ಪಷ್ಟಪಡಿಸಿದೆ.

ಫೇಸ್​ಬುಕ್ ಮತ್ತು ಇನ್​ಸ್ಟಾಗ್ರಾಂ ಪೇಜ್​ ಓಪನ್​ ಆಗುತ್ತಿದೆ. ಆದರೆ, ಕಳೆದ 8 ಗಂಟೆಗಳಿಂದ ಫೋಟೋ ಅಪ್​ಲೋಡ್​ ಮಾಡಲು, ಸ್ಟೇಟಸ್ ಹಾಕಲು ಸಾಧ್ಯವಾಗುತ್ತಿಲ್ಲ ಎಂದು ಕೆಲವು ಬಳಕೆದಾರರು ಹೇಳಿದ್ದಾರೆ. ವಾಟ್ಸ್ಆಪ್‌ನಲ್ಲಿಯೂ ಕೂಡ ವಾಯ್ಸ್‌ನೋಟ್‌ನಂತಹ ಕೆಲವು ಆಯ್ಕೆಗಳು ಸರಿಯಾಗಿ ಕಾರ್ಯನಿರ್ವಹಿಸುತ್ತಿಲ್ಲ ಎಂದು ಹಲವು ಬಳಕೆದಾರರು ಹೇಳಿದ್ದಾರೆ. ಹೀಗೆ ಫೇಸ್‌ಬುಕ್ ತನ್ನ ಕಾರ್ಯ ನಿರ್ವಹಿಸದೇ ಇರುವುದಕ್ಕೆ ಟ್ವಿಟ್ಟರ್‌ನಲ್ಲಂತೂ ಬಾರೀ ಟ್ರೋಲ್ ಮಾಡಲಾಗಿದೆ.

ಈ ಮೊದಲು ಜಿ-ಮೇಲ್ ಮತ್ತು ಗೂಗಲ್​ ಮ್ಯಾಪ್ ಸೇರಿದಂತೆ ಇತರೆ ಅಪ್ಲಿಕೇಷನ್​ಗಳು ಸಹ ಇದೇರೀತಿ ತಾಂತ್ರಿಕ ತೊಂದರೆಯನ್ನು ಎದುರಿಸಿದ್ದವು. ಲಾಗಿನ್, ಲಾಗೌಟ್​ನಂತಹ ಸಮಸ್ಯೆ ಜಗತ್ತಿನ ಅತಿಹೆಚ್ಚು ಬಳಕೆದಾರರಿರುವ ಜಿ-ಮೇಲ್​ನಲ್ಲಿ ಕಾಣಿಸಿಕೊಂಡಿತ್ತು. ಇದರಿಂದಾಗಿ ಜಿ-ಮೇಲ್ ಬಳಕೆದಾರರು ಈ ಬಗ್ಗೆ ದೂರನ್ನೂ ನೀಡಿದ್ದರು. ಆದರೆ, ಫೇಸ್‌ಬುಕ್ ಡೌನ್ ಆಗುತ್ತಿರುವುದು ಇದೇ ಮೊದಲಲ್ಲ. ಕಳೆದ ವರ್ಷ ಕೂಡ ಇದೇ ರೀತಿಯ ಸಮಸ್ಯೆಯನ್ನು ಫೇಸ್‌ಬುಕ್ ಎದುರಿಸಿದ್ದನ್ನು ನೀವು ನೋಡಬಹುದು.

   
 
ಹೆಲ್ತ್