ಇಸ್ರೋ ಮೇ 22ರಂದು ಭೂ ಪರಿವೀಕ್ಷಣೆಯ ರೇಡಾರ್‌ ಇಮೇಜಿಂಗ್‌ ಉಪಗ್ರಹ ಆರ್‌ಐಸ್ಯಾಟ್‌-2ಬಿ ಯನ್ನು ಪಿಎಸ್‌ಎಲ್‌ವಿ-ಸಿ46 ಮೂಲಕ ಬಾಹ್ಯಾಕಾಶಕ್ಕೆ ಕಳುಹಿಸುವುದಾಗಿ ಹೇಳಿತ್ತು. ಆ ಪ್ರಕಾರ ಪಿಎಸ್‌ಎಲ್‌ವಿ ಸಿ46 ಉಡಾವಣೆಯು ಬುಧವಾರ ಮೇ 22ರಂದು ನಸುಕಿನ 5.27ರ ವೇಳೆಗೆ ಆಂಧ್ರ ಪ್ರದೇಶದ ಶ್ರೀಹರಿಕೋಟದಲ್ಲಿನ ಸತೀಶ್ ಧವನ್ ಬಾಹ್ಯಾಕೇಶ ಕೇಂದ್ರದಿಂದ ನಡೆಯಲಿದೆ. ಇದು ಹವಾಮಾನ ಸ್ಥಿತಿಗತಿಯನ್ನು ಅವಲಂಬಿಸಿರುತ್ತದೆ ಎಂದು ಇಸ್ರೋ ಹೇಳಿದೆ

ಇಸ್ರೋ ಉಡಾವಣೆ ಮಾಡುತ್ತಿರುವ ರೇಡಾರ್ ಇಮೇಜಿಂಗ್ ಉಪಗ್ರಹದಲ್ಲಿ ಆಕ್ಟಿವ್‌ ಸೆನ್ಸರ್ ಜತೆಗೆ ಸಿಂಥೆಟಿಕ್ ಅಪರ್ಚರ್‌ ರಾಡಾರ್‌ (SAR) ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ. ಇದು 500 ಕಿ.ಮೀ.ಗೂ ಅಧಿಕ ದೂರದಿಂದ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಹೊಂದಿದ್ದು ಇದು ರಕ್ಷಣೆ ಮತ್ತು ಪ್ರಾಕೃತಿಕ ವಿಕೋಪ ನಿರ್ವಹಣ ಸಂಸ್ಥೆಗಳಿಗೆ ಬಹಳ ಪ್ರಯೋಜನಕಾರಿಯಾಗಲಿದೆ. ಹಗಲು ರಾತ್ರಿ ಸಮಾನ ಕ್ಷಮತೆಯಿಂದ ಕೆಲಸ ಮಾಡುವ ಸಾಮರ್ಥ್ಯ ಇದಕ್ಕಿದೆ ಎಂದು ಇಸ್ರೋ ತಿಳಿಸಿದೆ.

ಸಾಮಾನ್ಯವಾಗಿ ಉಪಗ್ರಹಗಳು ಮೋಡ ಅಥವಾ ಪ್ರತಿ ಕೂಲ ಹವಾಮಾನ ಸಂದರ್ಭ ತೆಗೆಯುವ ಚಿತ್ರಗಳಲ್ಲಿ ಸ್ಪಷ್ಟತೆ ಇರುವುದಿಲ್ಲ. ದಟ್ಟ ಮೋಡಗಳು ನಿರ್ಮಾಣ ವಾದರೆ ಭೂಭಾಗದ ಚಿತ್ರ ತೆಗೆಯಲು ಸಾಧ್ಯವಾಗುವುದಿಲ್ಲ. ಇದು ರಕ್ಷಣಾ ಕ್ಷೇತ್ರಕ್ಕೆ ಸವಾಲಿನ ಸಂಗತಿಯಾಗಿತ್ತು. ಆದರೆ ರೇಡಾರ್ ಇಮೇಜಿಂಗ್ ಉಪಗ್ರಹ ಈ ಸಮಸ್ಯೆಯನ್ನು ನಿವಾರಿಸಲಿದೆ. ರಕ್ಷಣೆ ಮತ್ತು ಪ್ರಾಕೃತಿಕ ವಿಕೋಪ ನಿರ್ವಹಣ ಸಂಸ್ಥೆಗಳಿಗೂ ಸಹ ಉಪಗ್ರಹ ಬಹಳ ಪ್ರಯೋಜನಕಾರಿ ಎಂದು ಹೇಳಲಾಗಿದೆ.

ಇಸ್ರೋ ಈಗಾಗಲೇ ರಾಡಾರ್‌ ವ್ಯವಸ್ಥೆ ಇರುವ ಇಂತಹ 2 ಉಪಗ್ರಹಗಳನ್ನು ಉಡಾವಣೆ ಮಾಡಿದೆ. 2009ರಲ್ಲಿ ಮತ್ತು 2012ರಲ್ಲಿ ಇವು ಬಾಹ್ಯಾಕಾಶವನ್ನು ಸೇರಿದ್ದವು. ಆದರೆ, ನಾಳೆ ಉಡಾವಣೆಯಾಗಲಿರುವ RISAT 2B ಈ ಎರಡು ಉಪಗ್ರಹಗಳ ಒಟ್ಟು ಸಾಮರ್ಥ್ಯಕ್ಕೆ ಸಮನಾಗಿದೆ ಎಂದು ಇಸ್ರೋ ತಿಳಿಸಿದೆ. ಇತ್ತೀಚಿನಆಕ್ಟಿವ್‌ ಸೆನ್ಸರ್ ಜತೆಗೆ ಸಿಂಥೆಟಿಕ್ ಅಪರ್ಚರ್‌ ರಾಡಾರ್‌ (SAR) ತಂತ್ರಜ್ಞಾನವು ಈ ಉಪಗ್ರಹಕ್ಕೆ ಮತ್ತಷ್ಟು ಬಲವನ್ನು ತುಂಬಿದೆ.