Back
Home » Business
ഗൃഹോപകരണങ്ങള്‍ വാങ്ങാൻ ഡെബിറ്റ് കാര്‍ഡ് ഇഎംഐ സേവനവുമായി എസ്ബിഐ
Good Returns | 8th Oct, 2019 05:25 PM

നിലവിലുള്ള ഇടപാടുകാര്‍ക്ക് താങ്ങാനാവുന്നതും സന്തോഷകരവുമായ ഷോപ്പിംഗ് അനുഭവം ലഭ്യമാക്കുകയെന്ന ലക്ഷ്യത്തോടെ രാജ്യത്തെ ഏറ്റവും വലിയ ബാങ്കായ എസ്ബിഐ 'ഡെബിറ്റ് കാര്‍ഡ് ഇഎംഐ' സൗകര്യമൊരുക്കി. ഇതനുസരിച്ച് ഗൃഹോപകരണങ്ങള്‍ വാങ്ങുന്നതിന്, ഇടപാടുകാര്‍ക്ക് അവരുടെ ഡെബിറ്റ് കാര്‍ഡ് ഉപയോഗിച്ച് ആറു മുതല്‍ 18 മാസംവരെയുള്ള ഇഎംഐ തെരഞ്ഞെടുക്കാം. രാജ്യത്തെ 1500ലധികം നഗരങ്ങളിലെ നാല്പതിനായിരത്തിലധികം വ്യാപാരസ്ഥാപനങ്ങളിലും നാലര ലക്ഷത്തിലധികമുള്ള പൈന്‍ ലാബുകള്‍ ബ്രാന്‍ഡുചെയ്ത പിഒഎസ് മെഷീനുകളിലും ഈ സൗകര്യം ലഭ്യമാണ്.

പ്രോസസിംഗ് ഫീസില്ല എന്നതാണ് ഡെബിറ്റ് കാര്‍ഡ് ഇഎംഐ സേവനത്തിന്റെ പ്രത്യേകത. മാത്രമല്ല ഡോക്കുമെന്റേഷനും ശാഖാ സന്ദര്‍ശനവും ആവശ്യമില്ല. നിലവിലുള്ള എസ്ബിഐ അക്കൗണ്ട് ബാലന്‍സ് കണക്കിലെടുക്കാതെ തന്നെ തത്സമയം വായ്പ ലഭ്യമാകും. ഇടപാടു നടത്തി ഒരു മാസത്തിനുശേഷം ആദ്യ ഗഡു അടയ്ക്കാന്‍ തുടങ്ങിയാല്‍ മതി.

നിങ്ങളുടെ ഡെബിറ്റ് കാര്‍ഡ് നഷ്ടപ്പെട്ടോ? പുതിയ കാര്‍ഡ് ലഭിക്കാന്‍ ഇതാ നാല് വഴികള്‍

മികച്ച ക്രെഡിറ്റ് ഹിസ്റ്ററിയുള്ളവർക്ക് ഈ വായ്പ എടുക്കാം. നിങ്ങൾക്ക് വായ്പയ്ക്ക് അര്‍ഹതയുണ്ടോയെന്ന് മനസിലാക്കാന്‍ ബാങ്കിലേക്ക് ഡിസിഇഎംഐ എന്ന് ടൈപ്പ് ചെയ്ത് 567676 എന്ന നമ്പരിലേക്ക് രജിസ്റ്റേഡ് മൊബൈല്‍ നമ്പരിൽ നിന്ന് എസ്എംഎസ് അയച്ചാല്‍ മതി.

ഇതുവഴി രാജ്യത്തെ വിവിധ വ്യാപാരസ്ഥാപനങ്ങളില്‍ നിന്നും ഇഎംഐ അടിസ്ഥാനത്തില്‍ ഡെബിറ്റ് കാര്‍ഡ് ഉപയോഗിച്ച് ഗൃഹോപകരണങ്ങള്‍ വാങ്ങാൻ ഇടപാടുകാർക്ക് സാധിക്കും. ഇടപാടുകാര്‍ക്ക് എളുപ്പത്തിൽ സാധനങ്ങള്‍ വാങ്ങുവാനും കടലാസ് രഹിതമായി വായ്പ എടുക്കുവാനുമുള്ള പുതിയ ചുവടുവയ്പാണ് ഡെബിറ്റ് കാര്‍ഡ് ഇഎംഐ എന്ന് എസ്ബിഐ ചെയര്‍മാന്‍ രജിനീഷ് കുമാര്‍ പറഞ്ഞു.

കാർഡ് കൈവശമുള്ളവർ സൂക്ഷിക്കുക; നിങ്ങൾ ഉടൻ ചെയ്യേണ്ട രണ്ട് കാര്യങ്ങൾ

malayalam.goodreturns.in