ಹೌದು, ಇಸ್ರೋ ಸಂಸ್ಥೆಯು ಇದೀಗ ಚಂದ್ರಯಾನ-3 ಯೋಜನೆ ಮೂಲಕ ಚಂದ್ರನ ಮೇಲೆ ಮತ್ತೊಮ್ಮೆ ಲ್ಯಾಂಡರ್‌ ಮತ್ತು ರೋವರ್‌ ಇಳಿಸಲು ಸಜ್ಜಾಗುತ್ತಿದೆ. ಈ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ಮುಂಬರುವ ನವೆಂಬರ್ 2020ರಲ್ಲಿ ನಡೆಸಲು ಇಸ್ರೋ ತಯಾರಾಗುತ್ತಿದೆ. ಈಗಾಗಲೇ ಈ ಯೋಜನೆಯ ಕುರಿತಾಗಿ ಸಿದ್ಧತೆಯ ಕೆಲಸಗಳನ್ನು ಶುರುಮಾಡಲಾಗಿದೆ ಎಂದು ಇಸ್ರೋ ಸಂಸ್ಥೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಚಂದ್ರಯಾನ-3 ಮಹತ್ವದ ಯೋಜನೆಯ ಕುರಿತು ಇಸ್ರೋ ತಂಡ ಸಿದ್ಧತೆಯಲ್ಲಿದ್ದು, ವರ್ಷ್ಯಾಂತ್ಯದೊಳಗೆ ವರದಿ ತಯಾರಾಗಲಿದೆ. ಈ ಬಾರಿಯ ಚಂದ್ರಯಾನದಲ್ಲಿ ಲ್ಯಾಂಡರ್‌ ಮತ್ತು ರೋವರ್‌ಗೆ ಹೆಚ್ಚಿನ ಪ್ರಾಧಾನ್ಯತೆ ನೀಡಲಾಗುತ್ತಿದೆ. ಏಕೆಂದರೇ ಚಂದ್ರಯಾನ-2 ರಲ್ಲಿ ಆರ್ಬಿಟರ್‌ ಉತ್ತಮವಾಗಿ ಕೆಲಸ ನಿರ್ವಹಿಸುತ್ತಿದೆ. ಹೀಗಾಗಿ ನೂತನ ಯೋಜನೆಯಲ್ಲಿ ಆರ್ಬಿಟರ್‌ಗೆ ಹೆಚ್ಚು ಒತ್ತನ್ನು ನೀಡಲಾಗುವುದಿಲ್ಲ ಎನ್ನಲಾಗಿದೆ.

ಚಂದ್ರಯಾನ-3 ಯೋಜನೆಯಲ್ಲಿ ಮಿಷನ್‌ನ ಪೇಲೋಡ್ ಸಾಮರ್ಥ್ಯವು ಸುಮಾರು 500 ಕಿ.ಗ್ರಾಂ ಇರಲಿದೆ ಎಂದು ನಿರೀಕ್ಷಿಸಲಾಗಿದೆ ಮತ್ತು ಉಡಾವಣೆಯ ಒಟ್ಟು ದ್ರವ್ಯರಾಶಿ 6 ಟನ್ ಅಥವಾ ಅದಕ್ಕಿಂತ ಹೆಚ್ಚಾಗಿರಲಿದೆ ಎನ್ನಲಾಗುತ್ತಿದೆ. ಅಕ್ಟೋಬರ್ 22, 2008 ರಲ್ಲಿ ಚಂದ್ರಯಾನ್ -1 ಮಿಷನ್ ಅನ್ನು ಯಶಸ್ವಿಯಾಗಿ ನಡೆಸಿದ್ದು, ಈ ಯೋಜನೆಯು ಚಂದ್ರನ ಮೇಲೆ ನೀರನ್ನು ಸಂಶೋಧಿಸಿತ್ತು.

ಹಾಗೆಯೇ ಜುಲೈ22, 2019ರಲ್ಲಿ ಚಂದ್ರಯಾನ-2 ಮಿಷನ್ ಉಡಾವಣೆಯಾಗಿದ್ದು, ಚಂದ್ರನ ದಕ್ಷಿಣ ಧ್ರುವದ ಅಧ್ಯಯನ ನಡೆಸುವ ಯೋಜನೆ ಹೊಂದಿತ್ತು. ಅದಕ್ಕಾಗಿ ವಿಕ್ರಂ ಲ್ಯಾಂಡರ್ ಚಂದ್ರನ ಅಂಗಳದಲ್ಲಿ ಹಗುರವಾಗಿ ಲ್ಯಾಂಡ್‌ ಆಗಬೇಕಿತ್ತು. ಆದರೆ ಇಸ್ರೊ ಅಂದುಕೊಂಡಂತೆ ಲ್ಯಾಂಡರ್ ಇಳಿದಿಲ್ಲ. ಆದ್ರೆ, ಈಗ ಇಸ್ರೋದಿಂದ ಚಂದ್ರಯಾನ-3 ಯೋಜನೆ ಸಿದ್ಧವಾಗುತ್ತಿದೆ.