Back
Home » Business
വാഹന നിർമ്മാണ ഘടകങ്ങളുടെ വിൽപ്പനയിൽ റെക്കോർഡ് ഇടിവ്
Good Returns | 7th Dec, 2019 01:18 PM

നടപ്പ് സാമ്പത്തിക വർഷത്തിന്റെ ആദ്യ ആറുമാസത്തിൽ ഇന്ത്യയിലെ വാഹന നിർമ്മാണ ഘടകങ്ങളുടെ വിൽപ്പനയിൽ 10 ശതമാനം ഇടിവ്. വിൽപ്പന 1.87 ലക്ഷം കോടി രൂപയായാണ് ചുരുങ്ങിയിരിക്കുന്നത്. പ്രാദേശിക വിപണിയിലെ ഉപഭോഗ മാന്ദ്യമാണ് വിൽപ്പന കുറയാൻ കാരണമെന്ന് ഓട്ടോമോട്ടീവ് ഘടക നിർമാതാക്കളുടെ അസോസിയേഷൻ (എസിഎംഎ) അറിയിച്ചു.

2019 ജൂലൈ വരെ ഈ മേഖലയിൽ ഒരു ലക്ഷം തൊഴിലവസരങ്ങൾ നഷ്ടപ്പെട്ടതായി വ്യവസായ സംഘടന അറിയിച്ചു. വാഹനങ്ങളുടെ ആവശ്യകത കുറഞ്ഞതിനെ തുടർന്ന് കമ്പനികൾ ഉൽ‌പാദനം കുറച്ചതിനാലാണ് ജീവനക്കാർക്ക് ജോലി നഷ്ട്ടപ്പെട്ടത്. താൽ‌ക്കാലിക ജീവനക്കാരാണ് ജോലി നഷ്‌ടപ്പെട്ടലവരിൽ അധികവും.

ഒലയും ഊബറുമാണോ വാഹന വിപണിയിലെ മാന്ദ്യത്തിന് കാരണം? സീതാരാമന് മാരുതിയുടെ മറുപടി

2020 ഏപ്രിൽ ഒന്നിന് പ്രാബല്യത്തിൽ വരുന്ന ബി‌എസ്-6 എമിഷൻ മാനദണ്ഡങ്ങളിലേക്കുള്ള പരിവർത്തനമാണ് മേഖലയിലെ മാന്ദ്യത്തിന് പ്രധാന കാരണം. വാഹന വ്യവസായം നീണ്ട മാന്ദ്യത്തെയാണ് നേരിട്ടു കൊണ്ടിരിക്കുന്നതെന്നും എല്ലാ വിഭാഗങ്ങളിലെയും വാഹന വിൽപ്പന കഴിഞ്ഞ ഒരു വർഷമായി കുത്തനെ കുറയുകയാണെന്നും വാഹന ഉൽപാദനത്തിൽ 15 മുതൽ 20 ശതമാനം വരെയുള്ള വെട്ടിക്കുറയ്ക്കൽ വാഹന ഘടകങ്ങളുടെ വ്യവസായത്തെയും നിക്ഷേപത്തെയും പ്രതികൂലമായി ബാധിച്ചുവെന്നും ഓട്ടോമോട്ടീവ് ഘടക നിർമ്മാതാക്കളുടെ അസോസിയേഷൻ പ്രസിഡന്റ് ദീപക് ജെയിൻ പറഞ്ഞു.

മാരുതി സുസുക്കി കഴിഞ്ഞ ദിവസം 2020ൽ കാറിന്റെ വില വർദ്ധിപ്പിക്കുമെന്ന് വ്യക്തമാക്കിയിരുന്നു. എന്നാൽ വർഷാവസാനം കാർ കമ്പനികൾ വില വർദ്ധനവ് പ്രഖ്യാപിക്കുന്നത് ബിസിനസ് തന്ത്രമാണെന്നാണ് സാമ്പത്തിക വിദഗ്ധരുടെ അഭിപ്രായം. അതായത് വരും വർഷം വില കൂടുമെന്ന് കണ്ട് മിക്ക ഉപഭോക്താക്കളും വർഷാവസാനം കാർ വാങ്ങും. ഇതുവഴി കാർ കമ്പനികൾക്ക് പുതിയ വർഷം ആരംഭിക്കുന്നതിന് മുമ്പായി നിലവിലെ സ്‌റ്റോക്ക് വിറ്റഴിക്കാനും സാധിക്കും.

ഇന്ത്യയിലെ വാഹന വിപണി 21 വർഷത്തിനിടയിലെ ഏറ്റവും വലിയ തകർച്ചയിൽ